ဒေနိ လူငယ်ချေတိကြားမာ အဆိုး၀ါးဆုံး ရိုက်ခတ်လာရေ online slot game  ကိစ္စ တဖဲ့ချေလောက်ပြောကြည့်ပါမေ။  online slot game အကြောင်း မပြောခင် ဒေဂိမ်းတိကို လူငယ်ချေတိကြားကို ရောက်အောင် ဇာပိုင်အယုံသွင်းခလေ့ ဆိုစွာ သတိထားမိအောင် တဖဲ့ချေလောက် စပ်စုကြည့်ကတ်ပါမေ ။

၁။ Social Mediaတိမာ လူငယ်ချေယုံကြည်လာအောင် မမာ့ အလှချေပုံတိ သုံးနာ မကဇာပ်ကေ ကဇာပ်ချင်လာအောင် seaxy ပုံတိနန့် သိမ်းသွင်းရေ။ နည်းစနစ်မျိုးစုံ ဂိမ်းကို လူသိလာအောင်လုပ်ရေ။ တချို့မမာ့ချေတိကလည်း ငွေတသောင်းလောက်ရကေ ဟုတ်မှန်ကြောင်း စစ်မှန်ကြောင်း ဖုန်းဖြေပီး ဂျင်းထည့်ပီးနီကတ်စွာ တပုံကြီး။

၂။ လူငယ်ချေတိ နိုင်ငံခြားရုပ်ရှင်ကား စိတ်၀င်စားရေလို့ သိလာရခါ ဘာသာပြန်ရုပ်ရှင်ကားတိ၊ ဟာသဗီဒီယိုအတိုတိမာ ဂိမ်းကြေညာလိုက်ထည့်ဖို့ချဉ်းကပ်ရေ။ (သိရေတချို့ဆိုက်တိလက်မခံ)  ငွေရာ မြင်ရေ တချို့ ဘာသာပြန် ၀က်ဘ်ဆိုဒ်တိ creator တိကတော့ ခုန်ပေါက်ပနာကြေညာ ထည့်နီကယင့်။ Telegram ရို့ပိုင် Social media ရို့မာ ရုပ်ရှင်ကို ပရိုမိုးရှင်းဆင်းရင်း ဂိမ်းပါဖြန့်ပြီးသားဖြစ်စီရေ။ ကြေညာအရိုက်ခံကတေ အဆိုတော်တိကလည်း လူငယ်ချေတိကြားမာ သီချင်းတပုဒ်နန့်ပေါက်လာရေ တက်သစ်စ အဆိုတော်ချေတိ။ မော်ဒယ်ပေါက်စတိများရေ။  ငွေရာပုံပီးလိုက်ကေ လူငယ်ချေတိ ဘ၀ပျက်ကေ ပျက်လီ ဒေဂိမ်းအကောင်း ဆုံးပါလို့ ကြေညာပီးနိန်ကတေ အဖွဲ့ကသက်သက်ကို ဟိရေ။ 

ဒေပိုင်နန့် ယုံထင်ကြောင်ဖြစ်လာပြီးကေ မွန်းကျပ်နီရေ လူငယ်တိစွာ online slot game  သားကောင်ဖြစ်လာရေ။

online slot game အကြောင်း တဖဲ့ချေချဉ်းကပ်ကြည့်ကတ်ပါမေ။

online slot game ဆိုစွာ Developer တိက remote jobနန့် ထိန်းချုပ်ထားရေ ဆော့ဖ်ဝဲလ်တစ်ခုဆိုစွာကို အရင်ဆုံးသတိရစီလိုပါရေ။ Slot game တိမာ Random Number Generator (RNG) ကို ဂိမ်းဧ့ ရလဒ်တိကို ကျပန်းဖြစ်ပေါ်စီရောင် ဖန်တီးဖို့ အသုံးပြုပါရေ။ ကျပန်းရလဒ်ထုတ်လုပ်ရေခါမာ Slot game တစ်ခုမာ ကဇာပ်လူက "spin" ခလုတ်ကို နှိပ်ရေအခါ၊ RNG က သိပ္ပံနည်းကျ အယ်လဂိုရစ်သမ်တစ်ခုကနိန် ကျပန်းနံပါတ်တစ်ခုကို ထုတ်ပီးပါရေ။ဒေနံပါတ်စွာ ဂိမ်းဧ့ သင်္ကေတတိ (symbols) သို့မဟုတ် reel တိအနီအထားကို ဆုံးဖြတ်ပီးပါရေ။ ဥပမာ၊ ဇာသင်္ကေတတိက ဇာနီရာမှာ ရပ်ဖို့လဲ ဆိုစွာကို ထိန်းချုပ်ပါရေ။ ဂိမ်းနာမည်နန့် ရုပ်ပံတိရာ ပြောင်းလားလိ့မေ၊ System က ယင်းတစ်ခုတည်းရာ ဖြစ်တေ။

RNG မှာ အဓိကအနိန်နန့် နှစ်မျိုးဟိပါရေ။

၁။ True Random Number Generator (TRNG): ဒေအမျိုးအစားက ဂိမ်းတိမာ ကောင်းမသုံးရေတွက်နန့် ထားခပါမေ။

၂။ Pseudo-Random Number Generator (PRNG): Slot game အများစုစွာ Pseudo-Random Number Generator (PRNG) ကို အသုံးပြုပါရေ။ ဒေချင့်က သင်္ချာဆိုင်ရာ အယ်လဂိုရစ်သမ်တစ်ခုကို အခြီခံပြီးကေ ကျပန်းနံပါတ်တိကို မြန်မြန်ဆန်ဆန် ထုတ်ပီးနိုင်ပါရေ။ PRNG မာ "seed value" (မူလတန်ဖိုး) တစ်ခုကို အသုံးပြုပြီးကေ နံပါတ်စဉ်တိကို ထုတ်လုပ်ပီးပါရေ။

RNG က ရလဒ်တိကို ကျပန်းဖြစ်စီကေလေ့ slot game တစ်ခုအနိုင်ရဖို့ အခွင့်အလမ်းစွာ  "Return to Player" (RTP) နန့် "volatility" ပေါ်မှာ မူတည်ပါရေ။ 

RTP က ဂိမ်းကဇာပ်သူတိကို ရီရှည်မှာ ပြန်ပီးရေ ရာခိုင်နှုန်းကို ဆိုလိုပြီးကေ၊ volatility က အနိုင်ရဖို့ အကြိမ်ရေနန့် ဆုကြေးပမာဏကို ထိန်းချုပ်ပါတယ်။ နားလည်အောင် ပြောရကေ ဥပမာ: slot game တစ်ခု RTP 95% ဆိုကေ၊ ကဇာပ်လူတိဧ့ လောင်းကြေးဖေသာ 96% စွာ ဆုလာဘ်အနိန်နန့် ပြန်ထွက်လာပြီးကေ ကျန်ရေ 5% က ဂိမ်းဖန်တီးလူဧ့ အမြတ်အစွန်းဖြစ်ရေလို့ ဆိုလိုပါရေ။ အနိုင်အရှုံး မူကွဲခြင်းကကို Random Number Generator (RNG)နန့် နှိပ်ရေ အကြိမ်အရေအတွက်ပေါ်မူတည်ပြီးကေ ဘယ်လောက်ကနိန် ဇာလောက်ထိ ပမာဏ ဆိုပြီးကေ ထည့်ပီးထားလိုက်ပါရေ။ တသိန်းထည့်ထားရေ သူတစ်ယောက်စွာအချိန်တခုကြာရေအခါ ၈သောင်းရာ ပြန်ရပါဖို့။ နောက်ဆုံးအကောင့်မာ တသိန်းထည့်ထားကေ ၈သောင်းရာ ကျန်အောင်လုပ်ထားလို့ဖြစ်ပါရေ။ 

နောက်တချက်က ဂိမ်းတိုင်းမာ level(အဆင့်) ဆိုစွာဟိပါရေ။ ဥပမာ-ဖုန်းနန့် ကားဂိမ်းမောင်းရေ၊ ချက်ထိုးရေ၊ ဘောလုံးကျောက်ရေ၊ ကိုယ်  level ကဇာလောက်လဲဆိုစွာ ရွီးချယ်ပြီးကေ နိုင်အောင် ဆော့ရပါရေ။ level နိမ့်ကေ နိုင်ဖို့လွယ်ပြီးကေ level မြင့်ကို ရွီးထားကေတော့နိုင်ဖို့ ခက်လားပါရာ။ slot game မာ ကျကေတော့ ယင့် သီအိုရီကို Volatility (သို့မဟုတ် Variance)လို့သုံးပါရေ။ Volatility ဆိုစွာ အနိုင်ရဖို့ အကြိမ်ရေနန့် ဆုလာဘ်ပမာဏဧ့ အန္တရာယ်အဆင့်ကို သတ်မှတ်ပီးစွာပါ။ ယင့်ချင့်က ဂိမ်းရလဒ်တိကို ကွဲပြားမှုပမာဏကို ဆုံးဖြတ်ပီးပါရေ။ Developer တိလက်ထဲမာရာဟိပါရေ။

အဆင့်သုံးဆင့်ဟိပါရေ-

1. Low Volatility: အနိုင်ရဖို့ အကြိမ်ရေ များပြီးကေ ဆုလာဘ်ပမာဏက သေးငယ်ပါရေ။ ငွေအနည်းချေကဇာပ်လူတိကို ဦးတည်ထားပါရေ။ ကစားသူတိ အနိန်နန့်  တနားတခါ အနိုင်ရနိုင်ကေလေ့ ဆုကြီးတွေ ရဖို့ ခဲယဉ်းရေ။ ဉပမာ- ငွေ တသိန်း ရင်းလူတစ်ယောက် အကြိမ် ၂၀ ကဇာပ်ဖို့လို့တွက်ထားလိုက်ကေ ၁၂ ကြိမ်လောက် အနိုင်ပီးထားလိုက်မေ။ ကျန် ၈ ကြိမ်မာ ယင်းတသိန်းလုံးအကုန်သိမ်းပါဖို့။ နိုင်တုန်းဆက်ဆော့ပြီးကေ တခါစရှုံးစွာနန့် ရပ်လိုက်ဖို့ပါ့ လို့ တွေးကောင်း တွေးလိ့မေ။ လောင်းကစားဆိုစွာ စလုပ်မိကေ အဆုံးဆိုစွာ မဟိပါ။ နိုင်ရေအခါ ပိုရချင်ရေ လောဘနန့် ဆော့မိပိုင် ၊ ရှုံးရေအခါ ရှုံးမဲမဲပြီး ပိုဆော့ဖြစ်တတ်ပါရေ ။ 

2. High Volatility: အနိုင်ရဖို့ အကြိမ်ရေ နည်းပြီးကေ ဆုလာဘ်ပမာဏက ပိုကြီးပါရေ။ လောဘသားတိကို ဖမ်းဖို့ အကောင်းဆုံးဂွင် ဖြစ်ပါရေ။ ကစားလူတိအနိန်နန့် ကြီးမားရေ ဆုကြေးတိ ရဖို့ အခွင့်အလမ်းဟိကေလည်း အနိုင်ရဖို့  အကြိမ်ရေ အများကြီး ရင်းရပါရေ။ 

Developer တိက ဒေ user ဧ့ algorithm(အယ်လဂိုရီသမ်) ကို ကောင်းကောင်းသိပါရေ။ ဇာအကြိမ် ဇာနှစ်ခါဆော့ပြီးရာ ဇာချိန်မာ တနားချေရပ်လားတတ်ရေ ဆိုစွာတိကိုလေ့ သိနိန်ရေအတွက် နန့် ဇာအချိန်မာ အနိုင်ပီးပြီးကေ ဇာအချိန်မာ အရှုံးလုပ်ပီးရဖို့လေ့ ကောင်းကောင်းသိပါရေ။ စိတ်ကိုမရိုးမယွ​ဖြစ်အောင် jackpot နန့် ကပ်လွဲပီးစွာတိ ၊ jackpotကို ၂ခါဆက်တိုက်ပီးပေါက်လိုက်စွာတိက ပြန်ဆော့ချင်အောင် မြူဆွယ်ဖို့အစ scripted လုပ်ပြီးသားဖြစ်ပါရေ ။ 

3. Medium Volatility: ဒေအဆင့်က ချင့်ချိန်ကဇာပ်လူတိအတွက်ဖြစ်ပါရေ။ ၅၀% နိုင် ၅၀% ရုံး RTP 20% ကိုရာစားဖို့ဖြစ်ပါရေ။ အနိုင်ရဖို့ အကြိမ်ရေနန့် ဆုလာဘ်ပမာဏအကြား မျှတရေ အလယ်အလတ်အဆင့်ဖြစ်ရေလို့ ပြောလို့ ရပါရေ။ယကေလည်း တသိန်းရင်းထားကေ ၈သောင်းရာကျန်ဖို့ ဆိုစွာတော့ မမိလီကေ့။ တနားက အနိုင်အရူံးကလည်း ယင်း ၈သောင်းကိုရာ အလှဲအလှယ်စနစ်နန့် ကိုယ့်အရိုးနန့် ကိုယ့်ပြန်ထိုးရေ သီအိုရီရာဖြစ်တေ။ လူအများနန့် ကဇာပ်ရေ Slot game တိဆိုကေ တဖွဲ့ကိုအနိုင်ပီးပြီးကေ တဖွဲ့ကို အရှုံးပီးပြထားရေ၊ User ချင်းချင်း ရှုံးလူပါးကတန်ဖိုးကို နိုင်လူပါး ယာယီထည့်ပေးထားလိုက်ရေ၊ အနိုင်နန့် မထွက်လားရအောင် ပုံစံမျိုးစုံ မက်လုံးပီးထားလိုက်ကေ၊ ဆက်ကဇာပ်လာအောင် မျှားခေါ်လိုက်ရေ၊ User များလာလီ Developer  တိအတွက် % များများရလီဖြစ်ပါရေ။

 အထက်က အချက်တိကို ပြန်သုံးသပ်ကြည့်ရကေ နိုင်ဖို့ဆိုစွာ နည်းလမ်းကို မဟိပါ၊ ယာယီနိုင်ရေလို့ ထင်ကောင်း ထင်လိမ့်မေ၊ ယင်းအနိုင်စွာ ကိုယ်ရင်းထားရေ အရင်းနန့် အရင် ရှုံးထားရေ အရှုံးထက် မပိုလာဆိုစွာကို သတိထားကြည့်ပါ။ 

slot game ဂိမ်းတိုင်းက မနိုင်လို့ ပြောလိုစွာတော့ မဟုတ်ပါ၊ ဂုပြောနိန်စွာက Developer တိလက်ထဲမာရာဟိရေ online slot game ကိုပြောနိန်စွာဖြစ်ပါရေ။ အများစုခံနိန်ရစွာကလေ့ online slot game တိဖြစ်ပါရေ။ ကာစီနိုရို့ ပိုင် အပြင်မာ လက်တွေ့ ကဇာပ်ရေ slot game ဆိုကေတော့ မဝေဖန်လိုပါ။ ဂုက Userတိဧ့ algorithm(အယ်လဂိုရီသမ်) တိကို သေသေချာချာတွက်ချက်ထားပြီးကေ programming နန့် အနိုင်ပိုင်း အမြတ်ထုတ်ရေ စနစ်တိ ဖြစ်နီလို့ ပြောရခြင်းဖြစ်ပါရေ။ 

တချို့ကအပျော်အပါးဆိုပြီးကေ ကဇာပ်ကတေ ယင့်အပျော်အပါးဆိုရေ နောက်မာ တရက်တာလုပ်အားခပါလားစွာကို သတိမပြုမိကတ်စွာက ပြောရခက်ပါရေ။ အရှုံးများလာရေခါ ပြန်ရလိုစိတ် ပိုကြီးလာပြီးကေ ရုန်းမထွက်နိုင်ဘဝနန့် ကုန်ဆုံးလာခရရေ လူငယ်တိ အများကြီးကြားလာရရေခါ စိတ်မကောင်းစရာချေတိပါ။

 "သမင်မွီးရင်း ကျားစားရင်း "ဆိုရေ ရှိ့က အဆိုအမိန့်အတိုင်း ကျားစားရင်း အကုန်မခံရအောင် သတိထားဆင်ခြင်နိုင်ကတ်ပါစီဟု ဆန္ဒပြုရင်း---

YaThaWinTha